WANAWAKE WAVUVI WAPATA MAFUNZO YA HAKI, YATAWASAIDIA KUJITAMBUA, KUJIKOMBOA.
Wanawake wanaojihusisha na uvuvi wa kiwango kidogo hapa nchini wameanza kunufaika na mafunzo maalum ya haki za binadamu yanayolenga kuwawezesha kujitambua, kujilinda na kudai haki zao katika sekta ya uvuvi.
Mafunzo hayo ya siku mbili yanaendeshwa na tume ya haki za binadamu na utawala bora (CHRAGG) kwa kushirikiana na taasisi ya Denmark ya haki za binadamu (DIHR), yakihusisha viongozi wa chama cha wanawake wavuvi Tanzania (TAWFA) kutoka maeneo mbalimbali.
Akizungumza wakati wa ufunguzi, Katibu mtendaji wa tume hiyo, Patience Ntwina, amesema mafunzo hayo yamelenga kuwajengea wanawake ujasiri wa kuwa walinzi wa haki zao na kupambana na unyanyasaji unaowakabili.
Amesema wanawake wavuvi wadogo ni mhimili muhimu wa usalama wa chakula, ajira na kukuza uchumi wa taifa, hivyo ni lazima wawe na uelewa wa haki zao na nafasi yao katika maendeleo ya sekta hiyo.
Kwa upande wake, Margrethe Dominic, Kaimu Mkurugenzi Msaidizi wa Idara ya Uvuvi, akizungumza kwa niaba ya Wizara ya Mifugo na Uvuvi, amesema sekta ya uvuvi nchini inategemea kwa kiasi kikubwa wavuvi wadogo wanaofikia asilimia 90, huku wanawake wakichangia pakubwa katika kuongeza thamani ya mazao ya uvuvi.
Ameeleza kuwa licha ya mchango wao mkubwa, wanawake bado wanakabiliwa na changamoto mbalimbali ikiwemo kushindwa kushiriki katika maamuzi, ukosefu wa fursa sawa na unyanyasaji wa kijinsia, hali inayohitaji juhudi za pamoja kuikabili.
Akitoa salamu za Mwenyekiti wa TAWFA Taifa, Bi. Beatrice Mmbaga,na viongozi wengine wa chama hicho wameishukuru Wizara ya Mifugo na Uvuvi pamoja na CHRAGG kwa kuendelea kuwashika mkono wanawake wavuvi, wakieleza kuwa mafunzo hayo yamewajengea uelewa na ujasiri wa kudai haki zao.
Wamesema kupitia mafunzo hayo, viongozi waliopata nafasi hiyo watakuwa mabalozi wa elimu kwa wanawake wengine ambao hawakushiriki, ili kuhakikisha haki na ushiriki wa wanawake katika sekta ya uvuvi unaimarishwa kote nchini.
