BALOZI SIRRO ATAKA WAHAMIAJI HARAMU KIGOMA WABANWE

 

Na Fadhili Abdallah,Kigoma

Mkuu wa Mkoa wa Kigoma Balozi Simon Sirro amezitaka mamlaka za serikali za mitaa  mkoani Kigoma kuendelea kuhimiza matumizi ya daftari la wakazi kwa viongozi wa vitongoji, vijiji na Mitaa ili kukabiliana na wimbi kubwa la wahamiaji haramu linaloingia mkoani humo kutoka nchi jirani .

Agizo hilo limekija kufuatia kuendelea kuwepo kwa idadi kubwa ya wakazi wasio raia wa Tanzania wanaoendela kuingia, kuishi na kufanya kazi mkoani Kigoma bila kufuata taratibu za kisheria za uhamiaji.

Balozi Sirro ametoa agizo hilo alipozungumza kwa nyakati tofauti kwenye vikao vya  mabaraza ya  Madiwani wa Halmashauri za mkoa wa Kigoma ambapo amewataka madiwani kushirikiana na viongozi wa vijiji au mitaa kuwafichua raia wa kigeni wanaoishi katika maeneo yao kinyume na Sheria za nchi.

Mkuu huyo wa mkoa alisema kuwa serikali kupitia vyombo vyake vya ulinzi na usalama vitaendelea kuchukua hatua ya kuendesha misako kuwakamata raia wa kigeni wanaoishi mkoani humo kinyume cha sheria lakini pia kuwachukulia hatua watu wote wanaoishi na kuwafanyisha kazi raia wa kigeni bila kufuata sheria.

Baadhi ya Madiwani walioshiriki kweye vikao hvyo vya mabaraza ya madiwani akiwemo Diwani wa viti maalum Halmashauri ya wilaya Kasulu, Asia Kasebo  wamekiri uwepo wa raia wa kigeni katika maeneo yao ambapo wamekuwa wakitumika kwa shughuli za uzalishaji mali hasa kilimo na ufugaji kinyume na Sheria na taratibu za nchi.

Mwisho.

Matukio Daima Habari hukuletea habari mpya Tanzania ikiwemo matokeo ya NECTA, elimu, ajira na matukio ya kila siku. Tembelea 👉 www.matukiodaimahabari.co.tz