WANANCHI WA KILOLO WAVUTIWA NA JITIHADA ZA MBUNGE RITHA KABATI KUPAMBANIA UBORESHAJI WA BARABARA
NA MATUKIO DAIMA MEDIA
Wananchi wa Jimbo la Kilolo wameonyesha kuvutiwa na kuridhishwa na jitihada za Mbunge wao, Ritha Kabati, kufuatia hatua zake madhubuti za kuibana Serikali bungeni kuhusu ubovu wa miundombinu ya barabara katika jimbo hilo.
Hatua hiyo imekuja baada ya Mbunge huyo kuibua hoja nzito bungeni jana, akieleza kwa kina changamoto kubwa zinazowakabili wananchi kutokana na hali mbaya ya barabara, hali inayodhoofisha maisha ya kila siku na shughuli za kiuchumi.
Akiwasilisha swali lake wakati wa kikao cha Bunge, Mheshimiwa Kabati alieleza kuwa barabara nyingi ndani ya Jimbo la Kilolo zipo katika hali mbaya kwa muda mrefu, huku baadhi zikiwa hazipitiki kabisa hasa wakati wa msimu wa mvua.
Alitaja hususan barabara ya Kilolo – Kising’a kuwa miongoni mwa barabara zenye maeneo korofi yanayozua adha kubwa kwa watumiaji wake.
Mbunge huyo alifafanua kuwa ubovu wa barabara hiyo umekuwa ukisababisha usumbufu mkubwa kwa wananchi wanaotumia barabara hiyo kila siku, wakiwemo wanafunzi wanaokwenda shule, wagonjwa wanaohitaji huduma za afya, pamoja na wakulima wanaotegemea barabara hiyo kusafirisha mazao yao kwenda sokoni.
Alisisitiza kuwa wakati wa mvua, baadhi ya maeneo ya barabara hiyo hukatika kabisa, hali inayosababisha wananchi kukwama na wakati mwingine kuhatarisha maisha yao.
Kutokana na changamoto hizo, Mheshimiwa Kabati alihoji Serikali kuhusu mpango wake wa muda mrefu wa kuboresha barabara ya Kilolo – Kising’a, akiuliza iwapo ipo mipango ya kuijenga kwa kiwango cha lami au zege, hususan katika maeneo korofi.
Alieleza kuwa ujenzi wa kudumu ungeiwezesha barabara hiyo kupitika mwaka mzima na kuondoa tatizo linalojirudia kila msimu wa mvua.
Mbali na hilo, Mbunge Kabati aliibua pia hoja ya upanuzi wa barabara katika eneo la Kitonga, akieleza kuwa eneo hilo limekuwa hatarishi kwa muda mrefu kutokana na msongamano mkubwa wa magari na hali finyu ya barabara.
Alibainisha kuwa Kitonga ni eneo muhimu kwa usafirishaji wa mizigo na abiria, lakini limekuwa likishuhudia ajali nyingi za barabarani zinazotokana na miundombinu isiyokidhi mahitaji ya sasa.
Kwa mujibu wa Mbunge huyo, upanuzi wa barabara ya Kitonga ni jambo la dharura kwani unahusisha usalama wa maisha ya wananchi na ustawi wa uchumi.
Alisisitiza kuwa kuchelewa kuchukua hatua kunaendelea kuhatarisha maisha ya watumiaji wa barabara hiyo na kuathiri mnyororo wa usafirishaji wa bidhaa kutoka na kwenda mikoa ya nyanda za juu kusini.
Kabati aliihimiza Serikali kuchukua hatua za haraka na za vitendo katika kushughulikia changamoto hizo, akieleza kuwa uboreshaji wa miundombinu ya barabara ni msingi muhimu wa maendeleo ya wananchi wa Kilolo na Taifa kwa ujumla.
Alisema bila barabara bora, jitihada za wananchi katika kilimo, biashara na huduma za kijamii haziwezi kuzaa matunda yanayotarajiwa.
Hatua za Mbunge Kabati zimepokelewa kwa hisia chanya na wapiga kura wake, ambao wameeleza kuwa maswali yake bungeni yameonyesha dhamira ya dhati ya kupigania maslahi ya wananchi.
Wananchi wengi wameeleza kuwa barabara hizo ni nguzo muhimu ya uchumi wa Kilolo, na kuboreshwa kwake kutaleta tija kubwa kwa wakazi wa eneo hilo na Taifa kwa ujumla.
Akizungumza kwa niaba ya wananchi, John Sangamatwa alisema kuwa wanatambua na kuthamini jitihada za Mbunge wao katika kupambania maendeleo ya Kilolo, hususan kwenye sekta ya miundombinu.
Alisema Mbunge Kabati amekuwa mstari wa mbele kuwasilisha kilio cha wananchi serikalini na kuhakikisha changamoto zao zinasikika katika ngazi ya juu ya maamuzi.
Kwa upande wake, Tedy Ngenzi alisema kuwa barabara za Kilolo zina umuhimu mkubwa si tu kwa wakazi wa eneo hilo bali pia kwa uchumi wa nchi za kusini mwa Afrika.
Alieleza kuwa barabara hizo ni sehemu ya mtandao mpana wa usafirishaji wa bidhaa na mazao kwenda masoko ya ndani na nje ya nchi, hivyo kuboreshwa kwake kutaimarisha biashara ya kikanda.
Aidha, alisisitiza kuwa Kilolo ni eneo la wakulima kwa kiasi kikubwa, na barabara bora ni nyenzo muhimu katika kuhakikisha mazao yanafika sokoni kwa wakati.
Alisema endapo miundombinu itaboreshwa, wakulima wataweza kuuza mazao yao kwa bei nzuri, kupunguza hasara, na hatimaye kukuza uchumi wao binafsi na wa jamii kwa ujumla.
Hata hivyo wananchi hao wametoa wito kwa Serikali kusikiliza hoja zilizowasilishwa bungeni na Mbunge wao, wakiamini kuwa utekelezaji wa miradi ya barabara utakuwa chachu ya maendeleo endelevu kwa Jimbo la Kilolo na Taifa kwa ujumla.