ASAS YAANZA MCHAKATO WA KUNUNUA BIASHARA YA GESI YA ORYX TANZANIA
NA MATUKIO DAIMA MEDIA
Kampuni ya ASAS Energies imekubali kununua biashara ya gesi ya kampuni ya Oryx Energies nchini Tanzania, hatua ambayo itaipa ASAS Group of Companies inayomilikiwa na wawekezaji kutoka Iringa udhibiti wa biashara iliyokuwa ikichangia zaidi ya theluthi moja ya soko la gesi ya kupikia Tanzania Bara katika kipindi kilichoishia Desemba 2025.
Tume ya Ushindani (FCC) imesema katika taarifa yake ya Novemba 10 kuwa imepokea taarifa rasmi kuhusu muamala huo na imeanza kupitia pendekezo la ununuzi huo.
Oryx Energies ilitangaza makubaliano ya kuuza biashara hiyo Oktoba 21, ingawa thamani ya mauziano hayo haijawekwa wazi.
Ununuzi huo utaifanya ASAS kudhibiti shughuli za uhifadhi wa gesi ya LPG, ujazaji wa mitungi pamoja na usambazaji, hatua inayotarajiwa kupanua biashara ya nishati ya kundi hilo sambamba na shughuli zake katika sekta za usafirishaji na ugavi, kilimo cha maziwa na majengo.
Kwa upande wake, Oryx imesema uuzaji wa biashara yake ya gesi ni sehemu ya mapitio mapana ya mali zake za biashara za nishati barani Afrika, huku kampuni hiyo ikielekeza uwekezaji zaidi katika miundombinu ya nishati na biashara ya nishati.
Iwapo muamala huo utaidhinishwa, ASAS itaongeza kwa kiasi kikubwa nafasi yake katika sekta ya gesi ya kupikia nchini Tanzania.